اسلام آباد میں ٹک ٹاکر ثناء یوسف کے قتل کے کیس میں ایک اہم پیش رفت سامنے آئی ہے۔ پولیس نے ملزم کو فیصل آباد سے گرفتار کر لیا ہے، جو خود بھی ٹک ٹاکر نکلا۔
آئی جی اسلام آباد علی ناصر رضوی نے پریس کانفرنس میں بتایا کہ قاتل کی گرفتاری کے لیے سات ٹیمیں تشکیل دی گئی تھیں اور 20 گھنٹوں کی محنت کے بعد ملزم کو گرفتار کیا گیا۔ قاتل نے مقتولہ کے موبائل فون اور قتل میں استعمال ہونے والا آلہ بھی اپنے قبضے میں رکھا تھا تاکہ شواہد مٹائے جا سکیں، تاہم پولیس نے تمام شواہد برآمد کر لیے ہیں۔
انہوں نے کہا کہ ملزم عمر حیات 22 سالہ نوجوان ہے، جو میٹرک فیل ہے اور مقتولہ سے بارہا رابطہ کرنے کی کوشش کرتا رہا، مگر ثناء یوسف نے اسے بار بار انکار کیا۔ اسی انکار کو اپنی توہین سمجھ کر ملزم نے قتل کی سازش کی۔
ثناء یوسف کو ان کے گھر جی 13/1 اسلام آباد میں دو گولیاں مار کر قتل کیا گیا تھا، جس نے پورے ملک میں غم و غصے کی لہر دوڑا دی۔ آئی جی نے یقین دہانی کرائی کہ قاتل کو ناقابل تردید شواہد کے ساتھ کیفر کردار تک پہنچایا جائے گا۔
پولیس نے بتایا کہ کیس کی تفتیش میں 300 سے زائد فون کالز کا تجزیہ کیا گیا اور 113 سیکیورٹی کیمروں کی ویڈیوز کا جائزہ لیا گیا تاکہ قتل کی گتھی سلجھائی جا سکے۔
یہ کیس سوشل میڈیا پر نوجوانوں کے لیے ایک شدید چیلنج بن چکا ہے، جہاں ثناء یوسف کی ہلاکت پر بڑے پیمانے پر ردعمل سامنے آیا ہے۔
