فلم ساز روہت شیٹی نے شاہ رخ خان کے ساتھ اپنی مبینہ کشیدگی کے حوالے سے خبروں پر خاموشی توڑ دی ہے۔
روہت شیٹی اور شاہ رخ خان نے چنئی ایکسپریس اور دل والے جیسی کامیاب فلموں میں ایک ساتھ کام کیا تھا، لیکن حال ہی میں دونوں کے درمیان تعلقات میں کشیدگی کی افواہیں سامنے آئی تھیں، خاص طور پر دل والے کی ناکامی کے بعد۔
چنئی ایکسپریس باکس آفس پر شاندار کامیاب رہی تھی، لیکن دل والے توقعات کے مطابق بزنس نہیں کر سکی، جس کے بعد دونوں کے درمیان دوری کی خبریں گردش کرنے لگیں۔
ایک پوڈکاسٹ میں گفتگو کرتے ہوئے روہت شیٹی نے ان افواہوں کی تردید کی اور کہا، “نہیں، ایسا کچھ نہیں ہے۔“
انہوں نے مزید وضاحت دیتے ہوئے کہا کہ “ہمارے درمیان ایک گہرا احترام ہے۔ دل والے کے بعد ہم نے اپنی پروڈکشن کمپنی قائم کی اور فیصلہ کیا کہ اب ہم اپنی فلمیں خود بنائیں گے تاکہ اگر نقصان ہو تو وہ ہمارا اپنا ہو۔” تاہم روہت نے یہ بھی بتایا کہ دل والے نے اوورسیز مارکیٹ میں بہترین بزنس کیا تھا۔
یاد رہے کہ دل والے 19 دسمبر 2015 کو ریلیز ہوئی تھی، جو شاہ رخ خان اور گوری خان کی پروڈکشن کمپنی ریڈ چلیز انٹرٹینمنٹ کے بینر تلے بنی تھی۔ اسی دن سنجے لیلا بھنسالی کی فلم “باجی راؤ مستانی” بھی سنیما گھروں میں پیش کی گئی تھی، جس میں دیپیکا پڈوکون، رنویر سنگھ اور پریانکا چوپڑا نے مرکزی کردار ادا کیے تھے۔
