بھارت اور اسرائیل کی جانب سے آسٹریلیا میں ہونے والے دہشت گردی کے واقعے کو پاکستان سے جوڑنے کی گمراہ کن مہم بری طرح ناکام ہو گئی ہے، جبکہ سڈنی ساحل پر ہونے والے حملے میں ہلاک ہونے والے مرکزی ملزم ساجد اکرم کے بھارتی ہونے کا انکشاف سامنے آ گیا ہے۔
گزشتہ روز آسٹریلیا کے شہر سڈنی میں پیش آنے والے دہشت گردی کے واقعے میں حملہ آور سمیت 16 افراد ہلاک اور 40 کے قریب زخمی ہو گئے تھے۔ پولیس کی جوابی کارروائی میں ایک حملہ آور موقع پر ہلاک جبکہ دوسرا زخمی حالت میں گرفتار کیا گیا، جو تاحال اسپتال میں زیر علاج ہے۔
واقعے کے فوری بعد بھارتی اور اسرائیلی میڈیا اور سوشل میڈیا اکاؤنٹس نے حملے کو پاکستان سے جوڑنے کی کوشش کی۔ ایک اسرائیلی اخبار نے حملہ آوروں کو پاکستانی قرار دیا جبکہ بھارتی خفیہ ایجنسی ”را“ سے منسلک سوشل میڈیا اکاؤنٹس نے بھی پاکستان مخالف پروپیگنڈا شروع کر دیا۔
ذرائع کے مطابق پاکستان کے سرکاری ریکارڈ میں ساجد اکرم اور نوید اکرم کے پاکستانی ہونے کا کوئی ثبوت موجود نہیں۔ آسٹریلیا میں موجود پاکستانی حکام کا بھی کہنا ہے کہ پاکستانی کمیونٹی کی جانب سے ان افراد کے پاکستانی ہونے سے متعلق کوئی اطلاع نہیں دی گئی۔
آسٹریلوی حکام کی جانب سے اب تک دی جانے والی بریفنگز میں بھی پاکستان کا کوئی ذکر نہیں کیا گیا۔ اس کے باوجود بھارتی میڈیا اور سوشل میڈیا پر یہ جھوٹا دعویٰ کیا گیا کہ ساجد اکرم سیاحتی ویزے پر آسٹریلیا گیا تھا، جبکہ حقیقت یہ ہے کہ ساجد اکرم 1998 میں اسٹوڈنٹ ویزے پر آسٹریلیا پہنچا تھا۔ بعد ازاں 2001 میں ایک آسٹریلین خاتون وارینا سے شادی کے بعد اس کا ویزا پارٹنر ویزا میں تبدیل ہوا، جس کی تصدیق آسٹریلیا کے ہوم منسٹر ٹونی بیورک کے بیان سے بھی ہوتی ہے۔
کچھ مغربی میڈیا اداروں نے یہ دعویٰ بھی کیا کہ امریکی انٹیلی جنس نے حملہ آوروں کے پاکستان سے تعلق کی تصدیق کی ہے، تاہم ذرائع کے مطابق ساجد اکرم گزشتہ 10 برس سے آسٹریلیا کے ایک گن کلب کا رکن تھا اور اس کے پاس 6 لائسنس یافتہ ہتھیار موجود تھے۔
ذرائع کا کہنا ہے کہ آسٹریلوی تفتیشی حکام نے بھی کہیں یہ بیان نہیں دیا کہ حملہ آوروں کا تعلق پاکستان سے تھا۔ مزید یہ کہ ساجد اکرم کے بیٹے اور حملہ آور نوید اکرم کے ساتھ کام کرنے والے ایک شخص نے بتایا کہ نوید کے والد ساجد اکرم کا تعلق بھارت سے جبکہ والدہ کا تعلق اٹلی سے ہے۔ اس کے مطابق ساجد اکرم کے پاس اسلحہ رکھنے کے باقاعدہ لائسنس بھی موجود تھے۔
یاد رہے کہ اس سے قبل بھارتی میڈیا نے آسٹریلیا میں مقیم پاکستانی شہری شیخ نوید کی تصاویر نشر کر کے انہیں سڈنی حملے کا دہشت گرد قرار دیا تھا، تاہم شیخ نوید نے ویڈیو بیان جاری کر کے اس بھارتی پروپیگنڈے کو بے نقاب کیا اور واضح کیا کہ ان کا اس واقعے سے کسی قسم کا کوئی تعلق نہیں۔
