ڈیرہ اسماعیل خان میں پولیس موبائل کو دہشتگردی کا نشانہ بنایا گیا، جس کے نتیجے میں اے ایس آئی سمیت 3 پولیس اہلکار شہید ہو گئے۔
پولیس کے مطابق پنیالہ کے علاقے میں ڈگری کالج کے قریب دہشتگردوں نے سڑک کنارے آئی ای ڈی نصب کر رکھی تھی۔ پولیس موبائل کے وہاں پہنچتے ہی دھماکا ہوا، جس کے فوراً بعد دہشتگردوں نے اہلکاروں پر فائرنگ بھی کی۔ حملہ آور موقع سے فرار ہوگئے جبکہ علاقے کی ناکہ بندی کرکے سرچ آپریشن شروع کر دیا گیا ہے۔ شہید اہلکاروں کی میتیں ڈی ایچ کیو اسپتال منتقل کر دی گئی ہیں۔
وزیر اعظم کی مذمت
وزیراعظم شہباز شریف نے حملے کی شدید مذمت کرتے ہوئے شہید اہلکاروں کے لیے گہرے دکھ اور افسوس کا اظہار کیا اور ان کے درجات کی بلندی کی دعا کی۔ انہوں نے زخمی اہلکار کو بہترین طبی سہولیات فراہم کرنے کی ہدایت کرتے ہوئے کہا کہ دہشتگردی کے مکمل خاتمے تک اس کے خلاف جنگ جاری رہے گی۔ وزیراعظم نے واقعے کے ذمہ داران کی نشاندہی اور انہیں سزا دلوانے کی ہدایت بھی کی۔
وزیر داخلہ کا خراجِ عقیدت
وفاقی وزیر داخلہ محسن نقوی نے پولیس موبائل پر حملے کی مذمت کرتے ہوئے شہید اے ایس آئی گل عالم، کانسٹیبل رفیق اور کانسٹیبل سخی جان کو خراج عقیدت پیش کیا۔ انہوں نے لواحقین سے دلی ہمدردی کا اظہار کرتے ہوئے کہا کہ خیبر پختونخوا پولیس کے بہادر جوانوں کی قربانیوں کو قدر کی نگاہ سے دیکھا جاتا ہے، اور ان کی یہ قربانیاں ہرگز رائیگاں نہیں جائیں گی۔
