متحدہ عرب امارات نے مشرق وسطیٰ میں بڑھتی ہوئی کشیدگی کے پیش نظر ایران کی جوہری تنصیبات پر کسی بھی قسم کے حملے کو فوری طور پر روکنے کا مطالبہ کیا ہے۔ اماراتی قیادت نے خطے میں امن اور استحکام کو اولین ترجیح قرار دیتے ہوئے تمام فریقین سے تحمل کا مظاہرہ کرنے اور سفارتی راستے اختیار کرنے پر زور دیا ہے۔
اماراتی صدر نے خطے کے اہم رہنماؤں سے ٹیلیفونک رابطے کیے اور موجودہ حالات پر گہرے تحفظات کا اظہار کیا۔ اس موقع پر تمام رہنماؤں نے اتفاق کیا کہ تنازعات کو طاقت کے بجائے بات چیت اور مذاکرات کے ذریعے حل کرنا ہی خطے میں دیرپا امن کی ضمانت ہے۔
یہ مطالبہ ایسے وقت سامنے آیا ہے جب ایران اور امریکہ کے درمیان کشیدگی اپنی انتہا کو پہنچ چکی ہے اور بین الاقوامی برادری اس صورتحال کو قابو پانے کے لیے متحرک ہے۔ ماہرین کا کہنا ہے کہ اگر فوری طور پر اقدامات نہ کیے گئے تو اس کشیدگی کے نہ صرف مشرق وسطیٰ بلکہ عالمی سطح پر سنگین نتائج برآمد ہو سکتے ہیں۔
