پاکستان کی معروف اداکارہ ماہرہ خان اور ہمایوں سعید نے عید الاضحیٰ پر ریلیز ہونے والی اپنی فلم “لو گرو” کی پروموشن کے دوران ایک دلچسپ انٹرویو میں شرکت کی۔ اس دوران جب دونوں سے پوچھا گیا کہ محبت میں تحفے کے طور پر کیا چیز پسند کرتے ہیں، تو ماہرہ خان نے سادگی سے کہا کہ انہیں چھوٹے چھوٹے تحفے پسند ہیں، جیسے چوڑیاں، کیونکہ چھوٹی چیزوں میں محبت کی زیادہ اہمیت ہوتی ہے۔
تاہم، ہمایوں سعید نے اس سوال کا جواب کچھ مختلف انداز میں دیا، جسے سن کر ماہرہ خان حیران رہ گئیں۔ ہمایوں نے کہا کہ انہیں اپنی بیوی سے بس ایک چیز کی خواہش ہے اور وہ ہے “اجازت”۔ انہوں نے وضاحت کی کہ وہ چاہتے ہیں کہ ان کی اہلیہ انہیں مکمل اعتماد کے ساتھ اجازت دے کہ “جاؤ جو کرنا ہے کرلو، لوٹ کر تو میرے پاس آؤ گے”۔ ہمایوں کے اس جواب نے ماحول میں ہلچل مچا دی اور ماہرہ خان کی حیرت بھی واضح ہوگئی۔
مزید برآں، ہمایوں سعید نے رشتوں میں سب سے اہم عنصر “بھروسہ” کو قرار دیا اور کہا کہ بغیر اعتماد کے کوئی بھی رشتہ قائم نہیں رہ سکتا۔ ماہرہ خان نے ہمایوں کی حاضر دماغی اور ہوشیاری کو سراہا۔
واضح رہے کہ ہمایوں سعید اور ماہرہ خان تقریباً 10 سال بعد ایک ساتھ فلم “لو گرو” میں نظر آئیں گے، جس کی ہدایت کاری ندیم بیگ نے کی ہے۔ اس فلم میں جاوید شیخ، مومنہ اقبال، احمد علی بٹ، رمشا خان، مرینہ خان، سہائے علی ابڑو اور پولش اداکارہ نتالیا جینوزیک بھی اہم کردار ادا کر رہی ہیں۔
