اسلام آباد: اسلام آباد ہائیکورٹ نے یوٹیوبر رجب بٹ اور ٹک ٹاکر ندیم نانی والا کی 10 دن کی راہداری ضمانت منظور کر دی۔
اسلام آباد ہائیکورٹ کے جسٹس انعام امین منہاس نے سماعت کے دوران رجب بٹ اور ندیم نانی والا کو عدالت میں پیش ہونے کے بعد یہ ضمانت دی۔ دوران سماعت درخواست گزار کے وکیل نے عدالت سے استدعا کی کہ چونکہ کراچی میں بھی مقدمہ درج ہے، لہٰذا 15 روز کی راہداری ضمانت دی جائے۔
جسٹس انعام منہاس نے مؤقف سننے کے بعد کہا کہ 10 دن کی حفاظتی ضمانت دی جا رہی ہے اور متعلقہ عدالت سے رجوع کیا جائے۔ عدالت نے ہدایت دی کہ دونوں ملزمان 10 دن کے اندر متعلقہ عدالت سے رجوع کریں۔
ملزمان کے خلاف گیمبلنگ ایپ کی تشہیر پر سائبر کرائم کی دفعات کے تحت مقدمات درج ہیں۔ اسلام آباد ہائیکورٹ نے گزشتہ روز پاکستان پہنچنے پر رجب بٹ کو ایئرپورٹ سے گرفتار نہ کرنے کا حکم بھی دیا تھا۔
واضح رہے کہ رجب بٹ کو برطانیہ کی جانب سے ویزا منسوخی کے بعد ملک بدر کیا گیا اور وہ گزشتہ روز پاکستان پہنچ چکے ہیں۔
