پشاور: خیبر پختونخوا میں رواں سال دہشت گردی کے واقعات میں ہونے والے جانی نقصانات سے متعلق پولیس رپورٹ جاری کر دی گئی ہے۔
پولیس رپورٹ کے مطابق رواں سال کے دوران دہشت گردی کے مجموعی طور پر ایک ہزار 588 واقعات پیش آئے، جن میں 223 شہری شہید جبکہ 570 زخمی ہوئے۔
رپورٹ میں بتایا گیا ہے کہ ان واقعات میں 137 پولیس اہلکار شہید اور 236 زخمی ہوئے، جبکہ قانون نافذ کرنے والے اداروں کے 18 اہلکار بھی شہید ہوئے۔ اسی طرح فیڈرل کانسٹیبلری کے 124 جوان شہید اور 244 زخمی ہوئے۔
پولیس رپورٹ کے مطابق رواں سال مختلف کارروائیوں کے دوران 348 دہشت گرد ہلاک کیے گئے۔ دہشت گردی کے سب سے زیادہ 394 مقدمات بنوں ریجن میں درج ہوئے، جہاں 41 پولیس اہلکار شہید اور 89 زخمی ہوئے، جبکہ 54 شہری شہید اور 125 زخمی ہوئے۔
ڈیرہ اسماعیل خان ریجن میں 152 مقدمات درج ہوئے، جہاں 137 دہشت گرد ہلاک کیے گئے۔
شمالی وزیرستان میں 181 کیسز رجسٹرڈ ہوئے، جن میں 38 شہری شہید اور 182 زخمی ہوئے۔
جنوبی وزیرستان میں 103 مقدمات درج کیے گئے، جہاں 39 شہری شہید اور 86 زخمی ہوئے۔
