کراچی کے علاقے ناظم آباد میں قادری ہاؤس پر چھاپے کے دوران بھتہ خوری کی متعدد وارداتوں میں ملوث 9 ملزمان کو گرفتار کر لیا گیا۔
ایس ایس پی ایس آئی یو عمران احمد خان کے مطابق ناظم آباد میں بھتہ خور گروپ وصی اللہ لاکھو اور عبدالصمد کاٹھیار واڑی کے خلاف کارروائی گرفتار ملزم ریحان الدین کی نشاندہی پر کی گئی۔ گرفتار ملزمان میں 3 بھتہ خور، 3 شوٹرز اور دیگر شامل ہیں، جبکہ 8 ملزمان کا سابقہ کرمنل ریکارڈ بھی موجود ہے۔
ایس ایس پی نے بتایا کہ ملزمان جمشید روڈ پر کار شوروم پر بھتہ کے لیے فائرنگ میں بھی ملوث ہیں۔ کارروائی انٹیلی جنس معلومات اور تکنیکی شواہد کی بنیاد پر کی گئی۔ ملزم ریحان الدین 4 سال تک بھتہ کے کیس میں جیل میں رہا ہے اور ایک الیکشن میں بھی حصہ لے چکا ہے۔
عمران احمد خان کے مطابق ثروت اعجاز قادری کے گھر پر چھاپے میں ملزمان کو حراست میں لیا گیا۔ چونکہ ملزمان حساس مقام سے گرفتار ہوئے، اس لیے معاملہ حساس ہوگیا۔ انہوں نے واضح کیا کہ کل کی واردات میں کسی دوسرے گروہ کا نام سامنے آیا ہے اور سنی تحریک کے رہنماؤں کا اس میں کوئی کردار نہیں تھا۔
ایس ایس پی کے مطابق جو افراد دوران تفتیش سامنے آئے، انہیں بھی گرفتار کیا گیا ہے۔ مجموعی طور پر 17 ملزمان حراست میں ہیں اور تمام سے تفتیش جاری ہے۔ اگر کسی کو ملزم کو پناہ دینے میں ملوث پایا گیا تو اس کے خلاف کارروائی کی جائے گی۔
