کراچی تا حیدرآباد نئی موٹروے کے لیے سروے شروع، ایم 6 حیدرآباد تا سکھر سیکشن کی منظوری

کراچی سے حیدرآباد تک نئی موٹروے کی تعمیر کے لیے ابتدائی سروے کا آغاز کر دیا گیا ہے، جبکہ موٹروے ایم 6 حیدرآباد تا سکھر سیکشن کی باضابطہ منظوری بھی دے دی گئی ہے۔

یہ پیش رفت وزیراعلیٰ سندھ مراد علی شاہ اور وفاقی وزیر مواصلات عبدالعلیم خان کے درمیان کراچی میں ہونے والی ملاقات کے دوران سامنے آئی، جس میں مختلف ترقیاتی منصوبوں پر تبادلہ خیال کیا گیا۔

وزیراعلیٰ سندھ نے موٹروے ایم 6 کی منظوری پر وفاقی حکومت کا شکریہ ادا کرتے ہوئے کہا کہ یہ منصوبہ سندھ کی ترقی کے لیے اہم سنگِ میل ثابت ہوگا۔ انہوں نے اس بات کی بھی تصدیق کی کہ کراچی تا حیدرآباد نئی موٹروے کے منصوبے کے لیے سروے کا کام باقاعدہ طور پر شروع کر دیا گیا ہے۔

دوسری جانب وفاقی وزیر مواصلات نے بتایا کہ ایم 6 موٹروے منصوبہ نیشنل ہائی وے اتھارٹی (NHA) کے تحت 363 ارب روپے کی لاگت سے تعمیر کیا جائے گا۔ اس موٹروے کو چار حصوں میں تقسیم کیا گیا ہے:

• نوشہرو فیروز سے رانی پور

• رانی پور سے سکھر

• حیدرآباد سے ٹنڈو آدم

• ٹنڈو آدم سے نوابشاہ

ایم 6 موٹروے کا مقصد سندھ کے شمالی و جنوبی اضلاع کو جدید سفری سہولیات سے جوڑنا ہے، جس سے نہ صرف تجارتی روابط مضبوط ہوں گے بلکہ اندرون سندھ سے بڑے شہروں تک رسائی بھی آسان ہو جائے گی۔

یہ منصوبے سندھ کی مواصلاتی ترقی میں اہم کردار ادا کریں گے، جبکہ کراچی تا حیدرآباد نئی موٹروے کی تعمیر سے ٹریفک دباؤ کم ہوگا اور سفری وقت میں نمایاں کمی آئے گی۔