جدہ: نجی ایئرلائن کی جدہ سے کراچی آنے والی پرواز کو اُس وقت ہنگامی طور پر واپس جدہ ایئرپورٹ پر لینڈنگ کرنی پڑی، جب ایک عمرہ زائر کی طبیعت دورانِ پرواز اچانک بگڑ گئی۔ مسافر کی شناخت فدا حسین کے نام سے ہوئی ہے، جو عمرہ کی ادائیگی کے بعد کراچی واپس آ رہے تھے۔
ذرائع کے مطابق پرواز پی اے 171 روانگی کے صرف ایک گھنٹہ 20 منٹ بعد ہی میڈیکل ایمرجنسی کی صورت میں واپس موڑ دی گئی۔ طیارے کی جدہ ایئرپورٹ پر ہنگامی لینڈنگ کے بعد متاثرہ مسافر کو فوری طور پر ایئرپورٹ میڈیکل یونٹ میں منتقل کیا گیا، جہاں ابتدائی طبی امداد کے باوجود ان کی حالت میں بہتری نہ آ سکی، جس پر انہیں اسپتال منتقل کر دیا گیا۔
ایئرلائن انتظامیہ کا کہنا ہے کہ متاثرہ مسافر کو مکمل طبی سہولیات فراہم کی جا رہی ہیں اور تمام اخراجات ایئرلائن کی جانب سے برداشت کیے جا رہے ہیں۔
دوسری جانب پرواز کے دیگر تمام مسافروں کو متبادل پرواز یا شیڈول کے مطابق کراچی روانہ کر دیا گیا ہے۔
یہ واقعہ ایک بار پھر فضائی سفر کے دوران ہنگامی طبی سہولیات کی اہمیت کو اجاگر کرتا ہے۔ مسافر کی موجودہ حالت کے بارے میں تاحال کوئی مزید تفصیل فراہم نہیں کی گئی۔
