کراچی: اورنگی ٹاؤن میں ڈکیتی کی مزاحمت پر شہری عبدالحنان جاں بحق ہو گیا، جس کے بعد مشتعل عوام نے ڈاکو کو شدید تشدد کا نشانہ بنا کر آگ لگا دی۔ اس واقعے کی ویڈیو سوشل میڈیا پر وائرل ہو رہی ہے۔
واقعہ اورنگی ٹاؤن تھانے کی حدود، سیکٹر سیون ایف بلوچ گوٹھ میں پیش آیا۔ پولیس کے مطابق، شہری عبدالحنان کے قتل کے بعد مشتعل ہجوم نے ڈاکو کو پکڑ کر بجلی کے کھمبے سے باندھ دیا اور پھر پیٹرول چھڑک کر آگ لگا دی۔ غفلت برتنے پر ایس ایچ او اورنگی ٹاؤن یوسف مہر کو معطل کر کے ہیڈ کوارٹر ویسٹ رپورٹ کرنے کے احکامات جاری کیے گئے ہیں۔
ویڈیو وائرل ہونے کے بعد پولیس نے تین مقدمات درج کیے ہیں:
-
شہری عبدالحنان کے قتل کا مقدمہ، جو اس کے سسرگل محمد خان کی مدعیت میں درج کیا گیا ہے، جس میں قتل اور ڈکیتی سمیت دیگر دفعات شامل ہیں۔
-
ہلاک شدہ ڈاکو کے قبضے سے غیر قانونی اسلحہ برآمد ہونے کا مقدمہ۔
-
پولیس کی مدعیت میں 30 سے 35 افراد کے خلاف مقدمہ، جس میں ہلاک ہونے والے ڈاکو کی شناخت ساجد ولد زرین داد کے نام سے ہوئی ہے۔
پولیس کا کہنا ہے کہ موبائل فون کی ویڈیوز کی مدد سے ملزمان کی شناخت کا عمل جاری ہے۔
