پنجاب میں مون سون بارشوں نے باقاعدہ دستک دے دی ہے۔ پراونشل ڈیزاسٹر مینجمنٹ اتھارٹی (پی ڈی ایم اے) نے تصدیق کی ہے کہ بارشوں کا پہلا اسپیل شروع ہو چکا ہے جو یکم جولائی تک جاری رہے گا۔
پی ڈی ایم اے کے ترجمان کا کہنا ہے کہ اس سال مون سون کا سیزن معمول سے 25 فیصد زیادہ بارشیں لا سکتا ہے، جس سے شہریوں کو گرمی سے ریلیف تو ملے گا مگر نچلے علاقوں میں اربن فلڈنگ کا خدشہ بھی بڑھ گیا ہے۔
محکمہ موسمیات کے مطابق، راولپنڈی، مری، گلیات، اٹک، جہلم، گجرات، اور گوجرانوالہ میں گرج چمک اور تیز ہواؤں کے ساتھ موسلادھار بارشیں متوقع ہیں۔ جبکہ جنوبی پنجاب کے علاقوں — ملتان، ڈیرہ غازی خان، بہاولپور اور بہاولنگر — میں 26 سے 28 جون کے دوران بارشوں کا سلسلہ شروع ہونے کا امکان ہے۔ ترجمان نے ضلعی انتظامیہ اور ریسکیو اداروں کو الرٹ رہنے کی ہدایت کرتے ہوئے شہریوں کو بھی احتیاط برتنے کی تاکید کی ہے، خاص طور پر نشیبی علاقوں میں رہائش پذیر افراد کو پیشگی حفاظتی اقدامات کرنے کا مشورہ دیا گیا ہے۔ مزید بتایا گیا ہے کہ پی ڈی ایم اے تمام اضلاع کے ساتھ مسلسل رابطے میں ہے اور ہنگامی حالات سے نمٹنے کے لیے ٹیموں کو متحرک کر دیا گیا ہے۔
