وزیراعظم شہباز شریف نے باغ میں دانش اسکول کے سنگِ بنیاد کی تقریب سے خطاب کرتے ہوئے کہا کہ جنگ کے دوران پاک فوج نے بھارت کو منہ توڑ جواب دیا، اور اس مؤقف کی بین الاقوامی سطح پر بھی توثیق ہوئی۔ انہوں نے کہا کہ امریکی کانگریس میں بھی اس حوالے سے پاکستان کے مؤقف کی بازگشت سنائی دی۔
وزیراعظم نے خطاب میں بتایا کہ پاکستان کی فضائیہ اور بری فوج نے صرف چار دن میں بھارتی افواج کو پیچھے ہٹنے پر مجبور کردیا۔ ان کا کہنا تھا کہ اس دور میں متعدد عالمی رہنماؤں نے بھی پاکستان کی دفاعی صلاحیتوں کا اعتراف کیا۔
تقریب کے دوران وزیراعظم نے کہا کہ دانش اسکول کا یہ سفر پنجاب سے شروع ہوا تھا جو اب پورے ملک میں پھیل رہا ہے۔ انہوں نے اعلان کیا کہ باغ میں قائم ہونے والا یہ دانش اسکول 23 مارچ 2026 کو باقاعدہ افتتاح کیا جائے گا۔ اسی طرح انہوں نے فارورڈ کہوٹہ میں بھی دانش اسکول قائم کرنے کا اعلان کیا۔
وزیراعظم کا کہنا تھا کہ دانش گاہیں ملک کے بہترین تعلیمی اداروں کا مقابلہ کرنے کی صلاحیت رکھتی ہیں۔ یہاں بچوں کو میرٹ پر مکمل مفت تعلیم، رہائش، یونیفارم اور دیگر سہولیات فراہم کی جائیں گی۔ انہوں نے مزید کہا کہ ممکن حد تک مقامی اساتذہ کو ان اداروں میں روزگار دیا جائے گا، تاکہ علاقے کے لوگوں کو بھی براہِ راست فائدہ پہنچے۔
