اسلام آباد: وفاقی حکومت کے ابتدائی 20 ماہ کے دوران لیے گئے قرضوں کی تفصیلات سامنے آ گئی ہیں، جن کے مطابق اس عرصے میں مجموعی قرضوں میں 12 ہزار 169 ارب روپے کا اضافہ ریکارڈ کیا گیا۔
دستاویزات کے مطابق وفاقی حکومت کے قرضوں میں یہ اضافہ مارچ 2024 سے اکتوبر 2025 کے دوران ہوا۔ اس دوران مقامی اور بیرونی دونوں قرضوں میں نمایاں اضافہ دیکھنے میں آیا۔
اسٹیٹ بینک آف پاکستان کی دستاویزات کے مطابق مارچ 2024 سے اکتوبر 2025 کے 20 ماہ کے دوران وفاقی حکومت کے مقامی قرضے میں 11 ہزار 300 ارب روپے جبکہ بیرونی قرضے میں 869 ارب روپے کا اضافہ ہوا۔
اعداد و شمار کے مطابق اکتوبر 2025 تک وفاقی حکومت کا مجموعی قرضہ بڑھ کر 76 ہزار 979 ارب روپے تک پہنچ گیا، جبکہ فروری 2024 تک یہ قرضہ 64 ہزار 810 ارب روپے تھا۔
اسٹیٹ بینک کی دستاویز کے مطابق فروری 2024 تک مرکزی حکومت کا مقامی قرضہ 42 ہزار 675 ارب روپے تھا، جو اکتوبر 2025 تک بڑھ کر 53 ہزار 975 ارب روپے ہو گیا۔
اسی طرح فروری 2024 تک وفاقی حکومت کا بیرونی قرضہ 22 ہزار 134 ارب روپے تھا، جو اکتوبر 2025 تک بڑھ کر 23 ہزار ارب روپے سے تجاوز کر چکا ہے۔
