اسلام آباد میں ناقص، غیر معیاری اور مضرِ صحت خوراک پیش کرنے والوں کے خلاف بڑی کارروائیاں سامنے آ گئی ہیں۔ سال 2024-25 کے دوران فوڈ سیفٹی حکام نے 13,595 فوڈ یونٹس کی انسپکشن کی، جن میں سے 1,427 ریسٹورنٹس پر 3 کروڑ 30 لاکھ روپے کے بھاری جرمانے عائد کیے گئے۔
رپورٹ کے مطابق، صفائی کے ناقص انتظامات، ایکسپائر اشیاء کے استعمال، اور کھانے کے محفوظ طریقہ کار کی خلاف ورزی پر 370 فوڈ پوائنٹس کو سیل کر دیا گیا، جبکہ 11 کے خلاف قانونی کارروائی بھی کی گئی۔ یہ قدم شہریوں کو غیر معیاری خوراک سے بچانے اور فوڈ بزنس مالکان کو ذمہ داری کا احساس دلانے کے لیے اٹھایا گیا۔
فوڈ سیفٹی رپورٹ میں یہ بھی انکشاف کیا گیا ہے کہ رواں سال 2,513 نئے فوڈ لائسنس جاری کیے گئے، جو ظاہر کرتا ہے کہ خوراک سے متعلق کاروبار میں وسعت آ رہی ہے، مگر ساتھ ہی مانیٹرنگ کا نظام بھی سخت کیا جا رہا ہے۔
ماہرین کے مطابق، یہ کارروائیاں اس بات کا ثبوت ہیں کہ شہریوں کی صحت کے تحفظ کے لیے قوانین پر سختی سے عملدرآمد کیا جا رہا ہے۔ عوام سے اپیل کی گئی ہے کہ وہ کھانے پینے کی اشیاء خریدتے وقت احتیاط برتیں اور کسی بھی خلاف ورزی کی اطلاع فوری دیں تاکہ خوراک کی کوالٹی کو بہتر بنایا جا سکے۔
