بھارتی ریاست کرناٹک میں ایک شادی کی تقریب اس وقت ڈرامائی صورتحال اختیار کر گئی جب دلہن نے منڈپ پر موجود دولہا کو یہ کہہ کر انکار کر دیا کہ “میں کسی اور سے محبت کرتی ہوں”۔ پوسٹ گریجویٹ تعلیم یافتہ دلہن پلوی کی شادی ایک سرکاری اسکول کے استاد وینوگوپال سے طے تھی، اور تقریب میں سینکڑوں مہمان موجود تھے۔ شادی کی رسومات آخری مرحلے میں تھیں کہ دلہن کو ایک فون کال موصول ہوئی، جس کے بعد اس نے خود کو ایک کمرے میں بند کر لیا۔ کچھ دیر بعد اس نے خاندان کو بتایا کہ وہ کسی اور کو پسند کرتی ہے اور وینوگوپال سے شادی نہیں کر سکتی۔ رشتے داروں اور پولیس کی مداخلت کے باوجود پلوی اپنے فیصلے پر قائم رہی، اور بالآخر دولہا نے خود پیچھے ہٹنے کا فیصلہ کرتے ہوئے کہا کہ وہ کسی ایسی لڑکی سے شادی نہیں کرنا چاہتا جو اس کے ساتھ رہنا ہی نہ چاہے۔ اطلاع کے مطابق، دلہن کا محبوب ایک مختلف ذات سے تعلق رکھتا ہے، جس کے باعث وہ پہلے سچ بولنے سے گھبرا رہی تھی۔ شادی منسوخ کر دی گئی اور مہمان حیرت و صدمے کی کیفیت میں مبتلا ہو گئے۔
