لاہور: وزیر اعلیٰ پنجاب مریم نواز نے مرکزی بازاروں اور سڑکوں کے درمیان خوبصورت گرین بیلٹس بنانے کا حکم دے دیا ہے۔
وزیر اعلیٰ کی زیر صدارت اجلاس میں ہر ضلع، تحصیل اور شہر کے بیوٹیفکیشن پلان پر تفصیلی بریفنگ دی گئی۔ اجلاس میں بیوٹیفکیشن منصوبوں کی تکمیل کے لیے فروری سے مئی تک کا ہدف مقرر کیا گیا۔
بریفنگ کے مطابق پنجاب کے 39 اضلاع میں 132 بیوٹیفکیشن اسکیمیں 16 ارب 90 کروڑ روپے کی لاگت سے مکمل ہوں گی، جن میں سے 97 اسکیموں کے ورک آرڈر جاری کیے جا چکے ہیں جبکہ 88 پراجیکٹس کا آغاز کیا جائے گا۔
لاہور میں 18، سرگودھا میں 6، بہاولپور میں 16 اور گوجرانوالا میں 12 بیوٹیفکیشن پراجیکٹس شامل ہیں۔ راولپنڈی میں 17، فیصل آباد میں 13، ملتان میں 8 اور ساہیوال میں 24 پراجیکٹس مکمل کیے جا چکے ہیں۔
وزیر اعلیٰ پنجاب نے کہا کہ کھلے مین ہول، گندگی کے ڈھیر، ٹوٹی گرین بیلٹس اور خراب پینٹ پر فوری کارروائی کی جائے گی۔ انہوں نے واضح کیا کہ شہر کے ہر کونہ کو صاف اور خوشنما بنایا جائے، اور تجاوزات کے منظر پر آنے پر اسسٹنٹ کمشنر ذمہ دار ہوں گے۔
