امریکہ کی 27 سالہ کیرنشا میڈیسن گریس نے سوشل میڈیا کے ذریعے قائم ہونے والی محبت کو حقیقت میں بدلتے ہوئے پاکستان کا رخ کیا اور نہ صرف اسلام قبول کیا بلکہ پاکستانی نوجوان نعیم الحسن سے نکاح بھی کر لیا۔ کیرنشا اور نعیم کا رشتہ گزشتہ دو سال سے آن لائن رابطوں کی بنیاد پر قائم تھا، جو اب ایک نئے عہد کا آغاز بن گیا ہے۔
کیرنشا نے جھنگ میں واقع جامعہ عربیہ دارالہدیٰ میں اسلام قبول کرتے ہوئے اپنا نام ‘کنیز عائشہ’ رکھا۔ اس موقع پر دونوں کا نکاح مقامی علماء کے حضور ادا کیا گیا۔ کیرنشا نے میڈیا کو بتایا کہ انہوں نے پہلے اپنے سابق شوہر سے قانونی طور پر طلاق لے کر زندگی کا نیا آغاز کیا ہے اور اب پاکستان میں اپنے شوہر کے ساتھ مستقل قیام کا ارادہ رکھتی ہیں۔یہ واقعہ سوشل میڈیا کے ذریعے بننے والے بین الاقوامی رشتوں کی ایک منفرد مثال ہے، جہاں محبت نے ثقافتی اور جغرافیائی دیواروں کو توڑ کر دو دلوں کو جوڑ دیا۔ چند ماہ قبل بھی ایک امریکی خاتون نے پاکستان آ کر ایسے ہی عشق کی داستان رقم کرنے کی کوشش کی تھی۔ماہرین کے مطابق اس قسم کی محبتیں دنیا بھر میں بڑھتی ہوئی بین الثقافتی روابط اور جدید ٹیکنالوجی کی مدد سے ممکن ہو رہی ہیں، جو محبت کے تصور کو نئی جہت دے رہی ہیں۔یہ کہانی ثابت کرتی ہے کہ آج کے دور میں محبت کی کوئی حد نہیں، اور عشق کی قوت ہر سرحد کو پار کر سکتی ہے۔
