پاکستانی اداکار فواد خان کی بالی ووڈ میں واپسی پر بھارت میں مختلف ردِ عمل سامنے آ رہے ہیں۔ بھارتی فلم ساز اشوک پنڈت نے فواد خان کی واپسی پر اعتراض کیا، جبکہ سنی دیول اور امیشا پٹیل جیسے بھارتی اداکاروں نے اس کی حمایت کی۔
سنی دیول نے کہا کہ “فنکار سرحدوں سے آزاد ہوتے ہیں اور دنیا بھر کے لیے کام کرتے ہیں۔” امیشا پٹیل نے بھی فواد خان کی تعریف کرتے ہوئے کہا کہ “فن میں کوئی تفریق نہیں ہونی چاہیے، اور ہر فنکار کا استقبال کیا جانا چاہیے۔”
پاکستانی فنکاروں پر پابندی کا پس منظر
2016 میں پاکستانی فنکاروں پر بھارت میں کام کرنے پر پابندی عائد کی گئی تھی، لیکن 2023 میں بھارتی عدالت نے اس پابندی کو مسترد کر دیا۔ تاہم، بعض انتہا پسند جماعتوں نے اس پابندی کو برقرار رکھا ہوا ہے۔
فواد خان کی واپسی
فواد خان آخری بار 2016 میں ریلیز ہونے والی فلم “اے دل ہے مشکل” میں نظر آئے تھے، اور اب وہ جلد ہی بھارت کی رومانوی فلم “ابیر گلال” میں مرکزی کردار ادا کرتے دکھائی دیں گے۔ ان کی واپسی پر بھارت میں ملے جلے ردِ عمل دیکھنے کو مل رہے ہیں۔
