2025 کے پہلے تین ماہ میں لاکھوں پاکستانیوں نے روزگار کی تلاش میں بیرون ملک کا رخ کیا، بیورو آف امیگریشن کی جاری کردہ رپورٹ کے مطابق جنوری سے مارچ کے دوران مجموعی طور پر 1 لاکھ 72 ہزار 144 پاکستانی ملازمت کی غرض سے بیرون ملک گئے۔ ان میں سب سے زیادہ 99 ہزار 139 افراد مزدور کے طور پر روانہ ہوئے، جب کہ 38 ہزار 274 ڈرائیورز، 1,859 مستری، 1,689 باورچی، 849 ڈاکٹرز، 1,479 انجینئرز، 390 نرسز، 3,474 ٹیکنیشنز اور 1,058 ویلڈرز شامل ہیں۔ اس کے علاوہ 2,130 الیکٹریشنز اور 436 اساتذہ نے بھی بیرون ملک ملازمت اختیار کی۔ ممالک کے لحاظ سے سب سے زیادہ پاکستانیوں نے سعودی عرب (1,21,970) کا رخ کیا، جب کہ قطر (12,989)، عمان (8,331)، یو اے ای (6,891)، ترکیہ (870)، برطانیہ (1,454) اور دیگر ممالک جیسے امریکا، جرمنی، چین اور ملائیشیا بھی پاکستانیوں کی ترجیح رہے۔ یہ اعداد و شمار نہ صرف ملک میں معاشی حالات کا عکس ہیں بلکہ بیرون ملک پاکستانی ہنر مندوں اور محنت کشوں کی بڑھتی مانگ کی بھی عکاسی کرتے ہیں۔
