شکارپور میں ڈاکوؤں کے خلاف جاری آپریشن کے دوران زخمی ہونے والے ڈی ایس پی میاں بیوی نے اسپتال میں اپنی شادی کی دوسری سالگرہ منائی۔
گزشتہ دنوں شکارپور میں ڈاکوؤں کے خلاف آپریشن کے دوران 9 ڈاکو ہلاک ہوئے جبکہ ڈی ایس پی پارس بکھرانی، ڈی ایس پی ظہور سومرو اور دو دیگر پولیس اہلکار زخمی ہوئے تھے۔ یہ اہلکار سکھر کے اسپتال میں زیر علاج ہیں اور ان کی حالت اب بہتر بتائی جا رہی ہے۔
زخمی اہلکاروں کی حوصلہ افزائی کے لیے سکھر کے میئر نے اسپتال پہنچ کر ڈی ایس پی میاں بیوی کی سالگرہ کا کیک کاٹا۔
پولیس حکام کے مطابق جدید اسلحے اور مربوط حکمت عملی کی بدولت ڈاکوؤں کے خلاف کارروائیوں میں نمایاں کامیابیاں حاصل ہو رہی ہیں۔ شکارپور، کشمور، گھوٹکی اور جیکب آباد میں جاری آپریشنز کے دوران تقریباً 200 جرائم پیشہ افراد ہلاک اور 550 سے زائد زخمی حالت میں گرفتار کیے جا چکے ہیں۔
اس دوران کئی علاقوں میں گھر گھر سرچ آپریشن کے دوران بھاری مقدار میں اسلحہ اور منشیات بھی برآمد ہوئی ہیں۔
