سندھ کے وزیرِ اطلاعات شرجیل انعام میمن نے مظاہرین کو ایک مضبوط پیغام دیتے ہوئے کہا ہے کہ کینال کے معاملے پر احتجاج کا حق سب کو ہے، مگر سڑکوں کو بند کر کے عوام کو مزید مشکلات میں نہ ڈالیں۔ ان کا کہنا تھا کہ “کینال پر احتجاج ضرور کریں، لیکن سڑکوں کو بند نہ کریں کیونکہ اس کی وجہ سے عام عوام کو مشکلات کا سامنا ہو رہا ہے، مال مویشی کے کنٹینرز پھنسے ہوئے ہیں اور کھانے پینے کی اشیاء بھی خراب ہو رہی ہیں۔“
شرجیل میمن نے مزید کہا کہ “ہم سمجھتے ہیں کہ احتجاج ہر شہری کا حق ہے، لیکن اس کا اظہار گراؤنڈز میں کیا جائے تاکہ سڑکوں کی بندش سے عوام کی زندگی متاثر نہ ہو۔” انہوں نے یہ بھی واضح کیا کہ مظاہروں کا اثر عام لوگوں پر پڑ رہا ہے اور عوامی زندگی کی روزمرہ ضروریات میں رکاوٹ آ رہی ہے۔
سندھ حکومت اور پیپلز پارٹی کے رہنما نے اس بات پر زور دیا کہ وہ ہمیشہ سندھ کے عوام کی نمائندگی کر رہے ہیں اور اس معاملے پر وفاقی حکومت کے ساتھ بات چیت کے لیے تیار ہیں۔ “اگر وفاقی حکومت اس معاملے پر مذاکرات کرنا چاہتی ہے تو ہم خوش ہیں اور اس پر بات چیت کے لیے تیار ہیں۔” انہوں نے مزید کہا کہ مذاکرات حکومت کی سطح پر ہوں گے، اور پیپلز پارٹی سندھ کے عوام کا مقدمہ ضرور لڑے گی۔
شرجیل میمن نے کہا کہ “ہماری کوشش ہے کہ مظاہرین سے بات چیت کے ذریعے مسائل حل کریں اور ان سے درخواست کرتے ہیں کہ وہ ریلوے ٹریک اور سڑکوں کو بند نہ کریں۔ احتجاج کا حق سب کو حاصل ہے، لیکن عوام کی زندگی کی روزمرہ سرگرمیاں متاثر نہ ہوں، یہ بھی ضروری ہے۔“
انہوں نے اپنے پیغام میں یہ بھی کہا کہ سندھ حکومت ہمیشہ عوام کے مفاد کے لیے کام کرے گی اور مسائل کا حل بات چیت سے نکالنے کی کوشش کرے گی۔ “ہمارا مقصد عوام کی تکالیف کو کم کرنا اور اس مسئلے کا ایک پائیدار حل تلاش کرنا ہے۔“
