سندھ کے سینئر وزیر نے کراچی میں مشتعل مظاہرین کی جانب سے جلائے گئے ڈمپروں کے معاملے پر سخت ردعمل دیتے ہوئے کہا ہے کہ 7 ڈمپرز کو نذرِ آتش کرنے والوں کے خلاف قانونی کارروائی کی جائے گی، اور یہ کارروائی کسی کے دباؤ یا دھمکی کی بنیاد پر روکی نہیں جائے گی۔ سندھ اسمبلی اجلاس میں گفتگو کرتے ہوئے وزیر کا کہنا تھا کہ جو افراد قانون ہاتھ میں لیں گے، ان سے قانون کے مطابق سختی سے نمٹا جائے گا۔ ان کا کہنا تھا:
“اگر کوئی بدمعاشی کرے گا تو اس سے بدمعاشی سے نمٹا جائے گا۔”
ایوان میں اپوزیشن اراکین کی جانب سے ڈمپر حادثے کے متاثرہ خاندانوں کو معاوضہ دینے کا مطالبہ بھی زور پکڑ گیا۔ ایم کیو ایم کے رکن طحہٰ احمد خان نے کہا کہ ڈمپر ڈرائیورز سے مذاکرات اور ان کے نقصان کے ازالے کا اعلان تو کر دیا گیا، مگر حادثے میں جاں بحق ہونے والوں کے لواحقین کو تاحال کسی قسم کے معاوضے کا اعلان نہیں کیا گیا۔ اس پر سندھ کے وزیر داخلہ ضیا لنجار نے یقین دہانی کرائی کہ متاثرہ خاندانوں کو معاوضہ دیا جائے گا۔ انہوں نے مزید کہا کہ اب تمام ڈمپر اور ٹینکر کی گاڑیاں بغیر کیمرے کے نہیں چل سکیں گی، اور ان کے ڈرائیورز کی لازمی تربیت لائسنس اتھارٹی سے کروائی جائے گی۔
واضح رہے کہ گزشتہ روز راشد منہاس روڈ پر پیش آئے افسوسناک حادثے میں تیز رفتار ڈمپر نے موٹر سائیکل پر سوار بہن اور بھائی کو کچل دیا تھا، جس کے نتیجے میں دونوں موقع پر جاں بحق جبکہ ان کے والد زخمی ہو گئے تھے۔ واقعے کے بعد مشتعل مظاہرین نے کم از کم 7 ڈمپروں کو آگ لگا دی تھی۔
واقعے میں گرفتار ڈرائیور کو جوڈیشل مجسٹریٹ کی عدالت میں پیش کیا گیا، جہاں تفتیشی افسر نے بتایا کہ ملزم کے پاس ہیوی ٹریفک چلانے کا کوئی اجازت نامہ نہیں ہے، بلکہ اس کے پاس صرف ایل ٹی وی لائسنس ہے جو 2016 میں ہی ایکسپائر ہو چکا ہے۔ عدالت نے ملزم کو دو روزہ جسمانی ریمانڈ پر پولیس کے حوالے کر دیا۔
