سعودی عرب کے ولی عہد اور وزیراعظم شہزادہ محمد بن سلمان نے وزیراعظم پاکستان شہباز شریف کی جانب سے دی گئی دورۂ پاکستان کی دعوت قبول کرلی ہے۔
وزارت خارجہ کے سینیئر حکام کے مطابق، محمد بن سلمان رواں سال 31 دسمبر سے قبل پاکستان کا دورہ کریں گے۔ یہ دورہ دونوں ممالک کے درمیان بڑھتے ہوئے تعلقات اور حالیہ باہمی معاہدوں کی توسیع کے تناظر میں اہم قرار دیا جا رہا ہے۔
یاد رہے کہ حالیہ دنوں میں وزیراعظم شہباز شریف نے سعودی عرب کا دورہ کیا تھا جہاں دونوں برادر ممالک کے درمیان ایک اہم دفاعی معاہدہ طے پایا۔ اس معاہدے کے مطابق، اگر کسی ایک ملک کے خلاف جارحیت کی جاتی ہے تو اسے دونوں ممالک کے خلاف جارحیت تصور کیا جائے گا۔
سعودی ولی عہد کا یہ متوقع دورہ نہ صرف پاکستان اور سعودی عرب کے تعلقات کو مزید مستحکم کرے گا بلکہ خطے میں سیکیورٹی اور معاشی تعاون کے نئے امکانات بھی روشن کرے گا۔
