بھارتی شہر احمد آباد میں ایئر انڈیا کے طیارے کے ہولناک حادثے پر وزیرِاعظم پاکستان میاں شہباز شریف نے گہرے رنج و غم کا اظہار کرتے ہوئے بھارتی عوام اور متاثرہ خاندانوں سے دلی ہمدردی کا اظہار کیا ہے۔
وزیراعظم نے سوشل میڈیا پر اپنے پیغام میں کہا کہ یہ سانحہ نہایت دلخراش ہے، اور انسانی جانوں کا ضیاع پوری دنیا کے لیے صدمے کا باعث ہے۔ اُنہوں نے کہا:
“ہم اس غم کی گھڑی میں بھارتی عوام کے ساتھ ہیں۔ جاں بحق افراد کے اہلِ خانہ سے دلی تعزیت اور زخمیوں کی جلد صحتیابی کے لیے دعاگو ہیں۔”
وزیراعظم شہباز شریف نے مزید کہا کہ دکھ، تکلیف اور انسانی المیوں میں سرحدیں معنی نہیں رکھتیں، ایسے سانحات انسانیت کو ایک کرنے کا موقع فراہم کرتے ہیں۔ اُنہوں نے عالمی برادری پر بھی زور دیا کہ اس طرح کے حادثات سے سبق سیکھتے ہوئے ایوی ایشن سیکیورٹی اور ہنگامی ردعمل کے نظام کو مزید مضبوط بنایا جائے۔واضح رہے کہ احمد آباد ایئرپورٹ کے قریب گر کر تباہ ہونے والے ایئر انڈیا کے مسافر طیارے میں 241 افراد ہلاک ہو گئے، جس پر دنیا بھر سے تعزیت اور ہمدردی کے پیغامات موصول ہو رہے ہیں۔
