امیر جماعت اسلامی پاکستان حافظ نعیم الرحمٰن نے شدید تنقید کرتے ہوئے کہا ہے کہ بے نظیر انکم سپورٹ پروگرام اب ملک میں ووٹ بینک بنانے اور کرپشن کے لیے استعمال ہو رہا ہے، جس سے اصل مستحقین کو فائدہ نہیں پہنچ رہا۔
پریس کانفرنس میں حافظ نعیم الرحمٰن نے بتایا کہ پاکستان میں تقریباً 11 کروڑ لوگ غربت کی لکیر سے نیچے زندگی گزار رہے ہیں اور اس تعداد میں اضافہ ہو رہا ہے۔ انہوں نے کہا کہ گزشتہ بجٹ میں کئی محکموں کو ٹیکس سے استثنیٰ دیا گیا جبکہ اسپیکر اور چیئرمین سینیٹ کی تنخواہوں میں 600 فیصد اضافہ کر کے عوام کے جذبات کو مجروح کیا گیا ہے۔
انہوں نے حکومت پر الزام عائد کیا کہ عوامی وسائل کا غلط استعمال ہو رہا ہے اور ایسے اقدامات عام آدمی کی مشکلات میں اضافہ کریں گے۔ ان کا کہنا تھا کہ حکومت کو چاہیے کہ وہ وسائل کو شفاف انداز میں استعمال کرے اور غربت کے خاتمے کے لیے حقیقی اقدامات کرے۔حافظ نعیم الرحمٰن نے زور دے کر کہا کہ پاکستان کو کرپشن اور ناجائز سیاسی مفادات کی سیاست سے پاک کرنا ہوگا تاکہ ملک حقیقی ترقی کی راہ پر گامزن ہو سکے۔
