بھارت میں اپنی نوعیت کا ایک انوکھا واقعہ پیش آیا ہے، جہاں ایک وفات پانے والے شخص نے الیکشن میں سب سے زیادہ ووٹ حاصل کر کے کامیابی حاصل کر لی۔
ریاست تلنگانہ کے ضلع راجنا سرسیلا کے ایک گاؤں میں گرام پنچایت سرپنچ کے انتخاب کے دوران غیر معمولی صورتحال دیکھنے میں آئی۔ الیکشن میں امیدوار مرلی نے اپنی وفات کے باوجود سب سے زیادہ ووٹ حاصل کیے۔
تفصیلات کے مطابق مرلی نے 5 دسمبر کو الیکشن کے لیے کاغذاتِ نامزدگی جمع کرانے کے کچھ دیر بعد دل کا دورہ پڑنے کے باعث انتقال کر گئے تھے۔ تاہم ان کی اچانک وفات کے باوجود حکام نے پولنگ کو مقررہ شیڈول کے مطابق جاری رکھنے کا فیصلہ کیا۔
چونکہ مرلی کی وفات سے قبل بیلٹ پیپرز چھاپے جا چکے تھے اور انتظامی و قانونی پابندیوں کے باعث ان میں فوری تبدیلی ممکن نہیں تھی، اس لیے مرلی کا نام بیلٹ پیپر پر برقرار رہا۔
گاؤں کے مکینوں نے بڑی تعداد میں مرلی کو خراجِ عقیدت پیش کرنے کے لیے ووٹ دیے۔ مرلی نے 700 سے زائد ووٹ حاصل کیے اور اپنے قریبی حریف کو تقریباً 378 ووٹوں کے فرق سے شکست دی۔
چونکہ کامیاب قرار پانے والا امیدوار وفات پا چکا ہے، اس لیے حکام نے حتمی نتائج کے اعلان کو عارضی طور پر روک دیا ہے اور پنچایت انتخابی قوانین کے تحت قانونی پہلوؤں کا جائزہ لیا جا رہا ہے۔
