وزیرِ دفاع خواجہ آصف نے انکشاف کیا ہے کہ بھارت افغان سرزمین کو پاکستان کے خلاف استعمال کر رہا ہے اور کابل میں طالبان کی پشت پناہی کر رہا ہے۔
ان کا کہنا تھا کہ طالبان اس وقت بھارت کی پراکسی کے طور پر کام کر رہے ہیں، اور نئی دہلی افغان سرزمین سے پاکستان کے خلاف کم شدت کی جنگ میں ملوث ہے۔ وزیرِ دفاع کے مطابق، اس حوالے سے حکومتِ پاکستان کے پاس ٹھوس شواہد موجود ہیں۔
خواجہ آصف نے بتایا کہ حالیہ جھڑپوں کے دوران جب طالبان کے ایک وزیر بھارت کے دورے پر تھے، اسی دوران پاکستان اور افغانستان کے سرحدی علاقوں میں تصادم ہوا۔ ان کے مطابق، افغان طالبان کی جارحیت کا پاکستانی فورسز نے مؤثر اور بھرپور جواب دیا، جس میں کئی پاکستانی جوانوں نے جامِ شہادت نوش کیا۔
وزیرِ دفاع نے مزید کہا کہ چند ماہ قبل بھارت کو ایک جنگ میں شکست کا سامنا کرنا پڑا، جس دوران بھارت کے سات جنگی طیارے مار گرائے گئے۔ ان کے مطابق، اس واقعے کا ذکر امریکی صدر نے بھی متعدد بار اپنے بیانات میں کیا ہے۔
خواجہ آصف نے واضح کیا کہ اگر افغان سرزمین پاکستان کے خلاف دہشت گردی کے لیے استعمال ہوئی تو اس کا جواب بھرپور انداز میں دیا جائے گا۔
ان کا کہنا تھا کہ پاکستان نے ہمیشہ یہ خواہش رکھی کہ دونوں ممالک امن اور باہمی احترام کے ساتھ رہیں، لیکن اگر کابل تصادم کا راستہ اختیار کرتا ہے تو پاکستان اپنے دفاع میں کسی بھی حد تک جانے کے لیے تیار ہے۔
