بارش میں گاڑی چلاتے وقت کن باتوں کا خیال رکھنا ضروری ہے؟ماہرین کی اہم ہدایات

ملک میں مون سون کا سلسلہ جاری ہے اور اس دوران کئی علاقوں میں شدید بارشوں کے باعث شاہراہوں پر حادثات میں اضافہ دیکھا گیا ہے۔ ان حادثات کے نتیجے میں قیمتی جانوں اور املاک کو نقصان پہنچا ہے۔ تاہم ماہرین کے مطابق بارش میں گاڑی چلانے کے دوران چند بنیادی احتیاطی تدابیر اپنا کر ان حادثات سے بچا جا سکتا ہے۔

ماہرین کے مطابق بارش کے دوران ڈرائیونگ کا سب سے بڑا خطرہ “ایکو پلاننگ” (Aquaplaning) ہوتا ہے۔ یہ وہ صورتحال ہے جب گاڑی کے ٹائروں اور سڑک کے درمیان ایک باریک پانی کی تہہ بن جاتی ہے، جس کے باعث ٹائر سڑک سے مکمل طور پر رابطہ کھو بیٹھتے ہیں اور ڈرائیور کو گاڑی پر سے کنٹرول حاصل نہیں رہتا۔

یہ خطرہ اس وقت مزید بڑھ جاتا ہے جب گاڑی کی رفتار 55 سے 80 کلومیٹر فی گھنٹہ یا اس سے زیادہ ہو، اور ٹائروں کا ٹریڈ روٹ 3 ملی میٹر سے کم ہو۔ دلچسپ بات یہ ہے کہ اگر سڑک پر صرف 2 ملی میٹر پانی بھی موجود ہو، تو بریک لگانے کی صورت میں گاڑی عام حالات کی نسبت دو سے تین گنا زیادہ فاصلے پر جا کر رکتی ہے، جو کسی بڑے حادثے کا سبب بن سکتی ہے۔

بارش میں محفوظ ڈرائیونگ کیسے ممکن ہے؟

ماہرین کے مطابق بارش میں گاڑی چلانے کے دوران:

• رفتار کم رکھنا سب سے بنیادی اور مؤثر احتیاط ہے۔

• آگے چلنے والی گاڑی سے مناسب فاصلہ رکھنا بھی ضروری ہے تاکہ اچانک بریک کی صورت میں تصادم سے بچا جا سکے۔

یہ دونوں تدابیر سڑک پر آپ کی گرفت کو بہتر بنانے، ایکو پلاننگ سے بچنے اور مجموعی طور پر محفوظ ڈرائیونگ میں مدد فراہم کرتی ہیں۔

مون سون جیسے موسم میں ذرا سی لاپرواہی بڑے نقصان کا باعث بن سکتی ہے۔ ذمہ دارانہ رویہ اور بروقت احتیاطی تدابیر نہ صرف آپ کی جان بلکہ دوسروں کی حفاظت کا بھی ضامن بن سکتی ہیں۔