وزیراعظم کے مشیر رانا ثنا اللہ کا کہنا ہے کہ ایک ملاقات کے دوران سابق آرمی چیف جنرل قمر جاوید باجوہ نے سابق ڈی جی آئی ایس آئی فیض حمید سے کہا کہ رانا بہت موٹا ہو گیا ہے، اسے دوبارہ اسمارٹ بناؤ۔
ایک انٹرویو میں بات کرتے ہوئے رانا ثنا اللہ نے کہا کہ بانی پی ٹی آئی عمران خان کے دور میں معاملات جنرل قمر جاوید باجوہ، فیض حمید اور بانی پی ٹی آئی کی مرضی سے ہی چل رہے تھے۔
انہوں نے کہا کہ ایسا ممکن ہی نہیں کہ کوئی حاضر سروس افسر آرمی چیف کی اجازت کے بغیر جھوٹا مقدمہ بنائے اور اگلے ہی دن اس کا کورٹ مارشل نہ ہو۔
رانا ثنا اللہ کے مطابق ایک بریفنگ کے دوران جنرل باجوہ اور فیض حمید سے گفتگو ہوئی، جس پر جنرل باجوہ نے کہا کہ رانا بہت موٹے ہو گئے ہو، جیل میں بہت اسمارٹ تھے، فیض، رانا صاحب کو دوبارہ اسمارٹ بناؤ۔
رانا ثنا اللہ نے مزید کہا کہ اس موقع پر انہوں نے جنرل باجوہ سے کہا کہ مجھ پر مقدمہ آپ ہی نے بنوایا تھا، اللہ اسی دنیا میں اس کا حساب کرے گا۔
