معروف ڈراما نگار خلیل الرحمان قمر نے اداکارہ ماہرہ خان کو ایک حیران کن مگر مثبت پیغام دیتے ہوئے کہا ہے کہ ’’آج کے بعد تم سے کوئی شکوہ نہیں رہا‘‘۔ یہ بیان انہوں نے حالیہ انٹرویو میں اس وقت دیا جب ماہرہ خان کے ایک پوڈکاسٹ میں دیے گئے بیان کا حوالہ آیا، جس میں ماہرہ نے تسلیم کیا کہ ماضی میں خلیل الرحمان قمر پر سوشل میڈیا کے ذریعے تنقید جذباتی ردِعمل تھا، اور انہیں چاہیے تھا کہ وہ براہِ راست ان سے بات کرتیں۔ خلیل الرحمان قمر نے ماہرہ کے اس اعتراف کو ’’بڑا پن‘‘ قرار دیتے ہوئے کہا کہ ان کی ہمیشہ عزت کی ہے، اور جب بھی تنقید کی، خود کو بھی تکلیف ہوئی۔ یاد رہے کہ 2020 میں ایک ٹی وی پروگرام کے دوران خلیل قمر اور ماروی سرمد کی تلخ کلامی پر ماہرہ نے ان پر تنقید کی تھی، جس پر تعلقات میں کشیدگی پیدا ہوئی تھی، تاہم اب دونوں کے بیانات نے تعلقات میں نرمی اور بہتری کی فضا پیدا کر دی ہے۔
